Kur Shqipëria vendosi të bëhej vend me demokraci përfaqësuese, e mori parasysh edhe faktin se sovraniteti i popullit shprehej nëpërmjet parlamentit të zgjedhur prej tij, ndaj dhe sistemi i zgjedhjeve ka rëndësi të dorës së parë. Megjithatë, debate mbi zhvillimet dhe dinamikat politike në rastin e Shqipërisë kanë mbizotëruar interesin e aktorëve të ndryshëm publik në këto 20 vite të tranzicionit post-komunist. Vëmendje të veçantë në opinionin publik në Shqipëri gjatë këtyre dy dekadave post-komuniste ka marrë konkurrimi, organizimi dhe funksionimi i partive politike. Edhe në këtë rast eksperienca e zbehtë me pluralizmin politik dhe periudha e gjatë kohore nën pushtetin e një partie shtet duket se është pasqyruar me forcë në praktikat, konkurrimin, organizimin, funksionimin e partive politike nga njëra anë dhe perceptimin, pritshmërinë, identifikimin me to nga ana tjetër. Ajo që mbetet emërues i përbashkët i këtyre 20 viteve në lidhje me partitë politike është pozicioni i tyre mbizotërues në raport me institucionet, ligjin dhe vetë shoqërinë duke ndërmarrë një shumëllojshmëri rolesh jo rastësisht shumë të ngjashëm me partinë shtet të para dy dekadave.
SISTEMET ZGJEDHORE NË SHQIPËRI – Evolucioni historik gjatë dy dekadave post-komuniste
Written by Shila Parllaku
